喺唐代年间，广州城有一个名叫儒生嘅读书人，连续几年科举考试都係名落孙山。一日，儒生听到：佛祖喺光孝寺讲经，第日应众回答众生提出嘅问题。儒生好想问下佛祖，自己几时先至得到功名。于是就成晚守喺光孝寺前。第二日，儒生第一个嚟到大雄宝殿，排咗个头位。
    嚟排队等住向佛祖提问嘅人好多。排喺第二位係个寡妇阿婶，个独生仔上咗前线去打仗，要问佢个仔几时先至平安返嚟；排喺第三位係个后生仔，同佢生死相恋嘅姑娘被选入京做宫女，远隔万水千山，想问几时先至能同心上人长相厮守。
    佛祖嚟到大雄宝殿。儒生见阿婶孤凄可怜，后生仔情感动天，就让佢哋两个先向佛祖提问啰。呢阵时又嚟咗一个农夫，话係受全村人嘅委托，嚟问点解啲农田连年受灾，点样做先至风调雨顺……
    佛祖回答咗前面两个问题后就讲：“仲有最后一次提问机会，儒生，你係唔係有嘢要问啊？”儒生上前拜见佛祖回答话：“我个人功名事小，灾民生存事大，儒生愿将呢个机会让畀农夫。”佛祖对儒生舍己为人嘅做法几满意，就讲：“儒生，你与我佛有缘，又有普救黎民之心，就唔好再去考科举嘞，我举荐你到农夫嘅村庄，做一方土地菩萨得嘞。”
    儒生做咗土地菩萨，将一方水土管治得风调雨顺，当地农田年年丰收。佛祖见佢才华横溢，就再次推荐佢连任，担负救渡众生嘅重任。 (责任编辑：admin)